سياسة الخصوصية

TaxBridge خدمة تشغّلها شركة BI Innovate. دورنا تقني بحت: بنستقبل بيانات فواتيرك من Zoho Books، بنحوّلها للصيغة الرسمية اللي مصلحة الضرائب المصرية بتطلبها، وبنرسلها لمنظومة الفاتورة الإلكترونية. إحنا مش مكتب محاسبة ولا مستشار ضريبي ولا وكيل عنك أمام المصلحة. بالنسبة لبيانات عملائك اللي بتعدّي علينا، انت صاحب البيانات والمتحكم فيها وإحنا بنعالجها لحسابك وبتوجيه منك.

بنجمع اللي الخدمة محتاجاه فعلاً، مش أكتر:

• بيانات الحساب: اسم الشركة، اسم المستخدم، البريد الإلكتروني، رقم التليفون، الرقم الضريبي وبيانات عنوان الشركة.
• بيانات المستندات: الفواتير وإشعارات الخصم والإضافة والإيصالات، وفيها أسماء عملائك وأرقامهم الضريبية وعناوينهم وبنود المستند.
• بيانات الربط: مفاتيح الوصول لـ Zoho Books وبيانات اعتماد مصلحة الضرائب الخاصة بك.
• سجلات الاستخدام: تواريخ وأوقات الإرسال، ردود مصلحة الضرائب، ومحاولات تسجيل الدخول.
• سجل الموافقات: وقت موافقتك على الشروط وسياسة الخصوصية ونسختهم، وعنوان الـ IP اللي جات منه الموافقة.

بيانات الدفع بتتعامل معاها جهة الدفع مباشرة — إحنا مابنشوفش ولا بنخزّن أرقام كروت.

بنستخدم بياناتك لتقديم الخدمة نفسها (بناء المستندات وإرسالها لمصلحة الضرائب ومتابعة حالتها)، ولإصدار فواتير اشتراكك وتحصيلها، وللتواصل معك بخصوص حسابك، ولتشخيص المشاكل لما مستند يترفض أو يتعلق، ولتحسين المنصة. مابنستخدمش بيانات فواتيرك ولا بيانات عملائك في تدريب أي نموذج ذكاء اصطناعي، ومابنبنيش منها أي منتج تحليلي.

إحنا مابنبيعش بياناتك ومش هنبيعها. بنشاركها فقط مع الجهات اللي الخدمة مش هتشتغل من غيرها، وكل جهة بتشوف الحد الأدنى اللي محتاجاه:

ممكن كمان نكشف بيانات لو صدر قرار من جهة قضائية أو سلطة مختصة تلزمنا بذلك قانوناً.

بياناتك مخزّنة على سيرفرات في مراكز بيانات داخل الاتحاد الأوروبي، مع عزل كامل بين بيانات كل شركة على المنصة. يعني بياناتك بتنتقل خارج مصر لأغراض التخزين والمعالجة — وباستخدامك للخدمة انت موافق على النقل ده. غير كده، المستندات نفسها بتتبعت لمصلحة الضرائب المصرية داخل مصر، ونسخة منها بتفضل على بوابة المصلحة وعلى Zoho Books بشكل مستقل عننا تماماً.

اللي مطبّق فعلاً عندنا:

• كل الاتصال بين متصفحك وسيرفراتنا وبين سيرفراتنا ومصلحة الضرائب مشفّر بـ TLS.
• كلمات المرور مخزّنة بـ bcrypt — مفيش حد يقدر يقرأها، ولا إحنا.
• تسجيل الدخول بيطلب كود تحقق على بريدك في كل مرة، والحساب بيتقفل مؤقتاً بعد محاولات فاشلة متكررة.
• عزل كامل بين الشركات على مستوى قاعدة البيانات — كل استعلام مربوط بحسابك.
• نسخ احتياطية دورية للبيانات، والنسخة اللي بتتخزّن خارج السيرفر مشفّرة قبل ما تطلع، ومراقبة تلقائية للسيرفر.
• كل webhook بيتحقق بمفتاح سري خاص بحسابك لوحده.

لو حصل أي اختراق يمس بياناتك، هنبلّغك بأسرع ما يمكن عملياً وبكل التفاصيل اللي نعرفها. مفيش نظام آمن ١٠٠٪ ومابنقدرش نوعد بغير كده.

مافيش بيانات بتفضل عندنا للأبد. المدد بالتحديد:

• الحساب شغّال: بنحتفظ ببياناتك طول ما حسابك مفتوح، لأن الخدمة مش هتقدر تشتغل من غيرها.
• بعد إغلاق الحساب: ٩٠ يوم، وبعدها بيانات فواتيرك وإيصالاتك وعملائك وأكواد الأصناف وحسابات المستخدمين بتتمسح نهائياً.
• فواتير اشتراكك وسجلات دفعاتك: ٥ سنين — ده التزام قانوني علينا إحنا كمُصدِر للفاتورة الضريبية (قانون القيمة المضافة ٦٧ لسنة ٢٠١٦ وقانون الإجراءات الضريبية الموحد ٢٠٦ لسنة ٢٠٢٠).
• أرشيف الرسائل الواردة من أزرار Zoho: ٩٠ يوم.
• الإشعارات داخل التطبيق: ٩٠ يوم. سجل عمليات الإدارة: ١٢ شهر.
• سجل الموافقات: بيفضل مع سجلاتنا المالية كإثبات للتعاقد، بعد مسح عنوان الـ IP وبيانات المتصفح منه.

الإغلاق في إيدك، من الإعدادات، من غير ما تكلم حد. اللي بيحصل بالترتيب:

• قبل الإغلاق بنقولك بالأرقام إيه اللي عندك، وبنعرض عليك تنزّل نسخة كاملة من بياناتك (ZIP فيه كل مستنداتك وإيصالاتك وأكواد أصنافك).
• الإغلاق محتاج تأكيد بكود على بريدك + كتابة اسم شركتك، وبتوافق صريح إن البيانات هتتمسح وإن مفيش استرداد للاشتراك.
• ساعة الإغلاق: الإرسال بيتوقف، وربط Zoho وبيانات اعتماد المصلحة بتتمسح من عندنا فوراً.
• خلال الـ ٩٠ يوم: بياناتك لسه موجودة. بنبعتلك تنبيه قبل المسح بـ ٣٠ يوم وتاني قبله بـ ٧ أيام، وفي أي وقت تكلمنا نبعتلك نسخة من بياناتك أو نفتح الحساب تاني.
• بعد الـ ٩٠ يوم: المسح بيحصل فعلاً وبنبعتلك إيميل يقولك إيه اللي اتمسح وإيه اللي فاضل وليه. بعد كده مفيش رجوع.

مهم: القانون المصري بيلزمك انت بالاحتفاظ بمستنداتك الضريبية ٥ سنين. المسؤولية دي مسؤوليتك مش مسؤوليتنا، فخُد نسختك قبل المسح — والمستندات اللي اترفعت للمصلحة موجودة برضه على بوابتها.

في أي وقت يحق لك: تطلب نسخة كاملة من بياناتك (متاحة فوراً من الإعدادات)، تصحّح أي بيانات غلط، تسحب موافقتك على الربط بـ Zoho (بفصل الربط)، تشوف سجل موافقتك على الشروط، أو تقفل حسابك وتمسح بياناتك. لو محتاج حاجة مش موجودة في الإعدادات، ابعتلنا على support@biinnovate.com وبنرد في مدة معقولة.

ممكن نحدّث السياسة دي مع تغيّر الخدمة أو المتطلبات القانونية. لو التغيير جوهري، هنبلّغك على بريدك المسجل قبل سريانه بـ ١٤ يوم، وهنطلب منك توافق على النسخة الجديدة أول ما تدخل. تاريخ النسخة السارية دايماً مكتوب فوق الصفحة دي.